Oarsoaldeko Hitza

Ezker Batua Berdeak-eko Presidentetza 2008ko ekainaren 9an, astelehena, bildu da Bilbon, eta EBAZPEN POLITIKO hau egitea erabaki du, Gipuzkoako PSE-EEk Arrasateko, Hernaniko eta Pasaiako udaletan zentsura-mozioak sustatuko dituela iragarri ondoren.


1.- Ezker Batua Berdeak-ek berriro diro indarkeria bete-betean gaitzesten duela. Era berean, indarkeria behin betiko eta inolako baldintzarik gabe desagertzeko eskatzen du. Horrez gain, ETA berehala desegitea aldarrikatzen du.

2.- Ezker Batua Berdeak-ek euren proiektu politikoak bide baketsu eta demokratikoen bidez defendatzeko eta indarkeriaren erabilera gaitzesteko eskatzen die Eusko Abertzale Ekintzari udal-eremuan eta EHAKi Eusko Legebiltzarrean.

3.- Ezker Batua Berdeak-ek babes eta elkartasun osoa adierazten die ETAren fanatismoaren eta intolerantziaren mehatxupean dauden pertsona, alderdi politiko eta erakunde guztiei, onartezina delako euren oinarrizko giza eskubideak urratzea.

4.- Ezker Batua Berdeak-ek, PSE-EEk unean-unean hartu ditzakeen erabakiak errespetatuta, alderdi politiko horri eskatzen dio mozio etikoen bidez eta orain iragarritako zentsura-mozioen bidez demagogia eta elektoralismo gehiago ez egiteko.

5.- Ezker Batua Berdeak-ek zentzu horretan gogoratzen dio PSE-EEri Eusko Abertzale Ekintzak gure udaletan dituen ordezkariek zuzenbide-estatuko galbahe guztiak igaro zituztela. Izan ere, 2007ko apirilean gobernuko presidenteordeak berak baieztatu zuen EAEko hautagaitza guztiek lege-eskakizun guztiak betetzen zituztela eta Alderdiei buruzko Legearen kontrakoak ez zirela.

6.- Ezker Batua Berdeak-ek PSE-EEren hipokresia salatzen du, orain etikaren eta irmotasunaren bandera aldarrikatzen duelako terrorismoaren aurka eta lehen ez zuelako gauza bera egin, biktimak T4an eraildako bi langile ekuadortar edo Frantziako Capbretonen tirokatutako bi guardi zibil izan zirenean. Ezker Batua Berdeak-en iritziz, zinismo handiz jokatzen du, Barajaseko aireportuko atentatuaren ostean ETArekin negoziatu zuelako eta orain terrorismoaren aurkako demokrazia eta lidergo eredu bakarra dela uste duelako PSE-EEk. Hala ere, hauteskunde-estrategia eta irudi-garbiketa baino ez da, ETArekin lortutako hitzarmen politikoak eta Batasunarekin ezkutuan egindako bilerak ahaztu daitezen. Izan ere, gogoan eduki behar dugu garai hartan indarkeria abian zegoela eta aldez aurretik inolako gaitzespenik eskatu ez zuela.