Krosaren antolatzaileak, Urko Colino eta Paco Lekunberri

Pasai Antxoko Gabonetako Herri Krosaren hirugarren ekitaldia igandean izango da. 11:00etan aterako dira korrikalariak irteeratik.  Izena emateko bi modu daude, bat aldez aurretik, eta bestea egunean bertan. Aurretik izena emateko Kirolprobak-en webgunera jo behar da, eta igandean bertan 10:00etatik aurrera dago izena emateko aukera Gure Zumardian. Parte hartzeko sei euro ordaindu behar dituzte kirolariek (asegurua, kamiseta, eta luntx txiki bat dago prezioaren barruan). Bost kilometroko bidea du probak, eta mozorro onenari saria emango diote.

• Asteazkena, hilak 26: Jolasak, tailerrak eta Gabonetako apaingarriak egingo dituzte barruti guztietan. San Pedron, horrez gain, Korri eta Xalto pailazoen eskutik Entresakarekin diskoko abestiez gozatzeko aukera izango da, 18:00etan. Antxon Hipo eta Tomax pailazoek Papo Pupa ikuskizuna eskainiko dute Kultur etxean. Donibanen Kiki eta Koko pailazoak egongo dira eta naturaren biziaren garrantziaz ikuskizuna eskainiko dute. Eta Trintxerpen Magiklown-eko pailazoek magia eta umorea eta trebetasuna elkartzen dituen ikuskizuna eskainiko dute.
• Osteguna, hilak 27: Barruti guztietan era askotako jolasak, tailerrak egongo dira: rokodromoa Trintxerpen, San Pedroko Mater ontzian Gabonetako piratak ariko dira, eta Donibanen txontxongiloen tailer berezia izango da, Margaren eskutik.
• Ostirala, hilak 28: Jolas eta tailerrez gain, barruti guztietan txokolate jatea izango da jaialdia borobiltzeko.

Jarduerak guztiak 16:00etatik 19:00etara izango dira, honako aretoetan:  Antxoko Kultur Etxean eta ludotekan, Trintxerpeko Karmengo Ama Eskolan, Donibaneko Udal Ludotekan, eta San Pedroko Udal Aretoan eta gimnasioan. Jarduera guztiak doakoak izango dira, Pasaiako 4 urtetik aurrerako haur guztientzat.

Aisialdi taldeei dagokienez, egiten duten “lan handia” nabarmendu du udalak: “Guztiak dabiltza haur eta gazte animazioan, eta Gazteria eta Kirol Departamentuarekin batera gogor lan egiten dute Gabonetako Haur Jaiak arrakastatsua izan daitezen, bai programazioari dagokionez, baita parte hartzeari dagokionez ere”.

Donibanen Gabonetako egitaraua prestatu dute. Gaur, Aiton-Amunen Aterpean jaiotza biziduna egingo dute, eta baita jaiotzen erakusketa ere. Gabonetako zorion postalen lehiaketa, txistorra jatea, toka eta bote lehiak ez dira faltako. Astelehenean, 18:00etan, Olentzero eta Mari Domingi irtengo dira Meipitik. Ordu berean eta toki beretik, 31n, abesbatza irtengo da. Urtarrilaren 5ean Erregeen Kabalgata egingo dute.

Antxoko Molinao Erreka Parkean aurreikusitako frontoiaren obrak egiteko lehenengo hondeamakinak atzo hasi ziren lanean. Lehenago, baina, ingurua ibilgailuz hustu zuten. Horregatik, aparkatzeko arazoak egongo direla onartu du udal gobernuak, eta «nahiz eta sakonago aztertu behar den», hainbat irtenbide prestatu dituzte.

Horrela, anbulatorioaren parean dagoen aparkalekuan egun osoz aparkatu ahal izango da (orain arte gauetan bakarrik egin zitekeen). Oinezkoak bertara iristen errazteko pasabide bat atonduko dute urtarril hasieran. Bi eskaera ere egin dituzte: Antxora doazenek garraio publikoa erabiltzeko, eta autoa Antxon aparkatzen duten kanpotarrei bere herrian aparkatzeko.

Bestalde, VAUMM arkitekto taldeak proiektuaren nondik norakoak azalduko ditu urtarrilaren 9an, 19:00etan, Kultur Etxean egingo den bileran.

Pasaiako Udalak datorren urteko ordenantza fiskalak zehaztu ditu. Herenegun onartu zituzten behin betiko, Trintxerpeko alkateordetzan egindako ezohiko udalbatzarrean.

Urteko azkeneko udalbatzarraren irudia da honakoa. Tasen gaia izan zen eztabaidagai nagusia.

Hiru aldaketa zeuden aurreikusita. Alde batetik, urriko plenoan onartutako akats tekniko bat konpondu zuten, Bildu eta Ezker Anitzaren aldeko botoekin. Bestetik, udaltzainek egindako proposamen bat aztertu zuten, kaleetan jartzen diren eta txanponez funtzionatzen duten makinen gainekoa. Ordaindu beharrekoaren koefizientea unitatetik 0,5era jaitsiko litzateke.

Askoz korapilatsuagoa izan zen PSE-EEk higiezinen gaineko zerga igotzeari jarritako emendakina aztertu zutenean. Herrian etxebizitza hutsak dituztenei zerga %150 igotzearen kontra proposamena egin zuten. Horrek Espainiako Konstituzioaren atal bat urratzen dutela uste dute sozialistek, «pertsonek duten bizitokia aukeratzeko eskubidea» urratzearena, hain zuzen ere (19. artikuluan). Ogasun zinegotzi Jose Luis Sanzek erantzun zien Pasaiatik kanpo bizi direnen interesak defendatzen zituztela, eta udalerrian norbaitek etxe hutsen bat balu, zerga igotzearen helburua berau alokairuan jartzea bultzatzea dela. Gainera, jasoko den dirua pasaitarrei bideratuko zaiela argitu zuen. Ezker Anitzako Xabier Pombok, berriz, sozialistei esan zien ezin dela «ezkerreko ikuspuntu batetik» higiezinak pilatzea defendatu.

Urriko plenoan aurrera atera zen gehiengo osoz udal zergak igotzea, PPko eta PSEko zinegotziek udalbatzarra utzi zutelako. Bixen Itxaso sozialistak Pombori zein EAJko zinegotziei esan zien herenegun zutela aukera proposamena bertan behera uzteko. Pombok azaldu zien ez zirela zergak ezer ere ez igotzeko «planteamenduan» eroriko, urrian «arduragabekeriaz» jokatu zutelako. EAJko Nahikari Oterminek sozialistei leporatu zien errua gainontzekoen bizkarrean jarri nahi zutela. Emendakina bertan behera uzteko bozketan abstenitu egin ziren jeltzaleak, eta Bilduk eta Ezker Anitzak alde egin zuten. PPren botoak, PSEren kontrakoei batu zitzaizkien.

Gainontzeko ordenantzei talde sozialistak egindako emendakinak bertan behera utzi zituzten Bilduren aldeko botoekin (PP eta PSE-EEk aurka bozkatu zuten).

Azkenik, ordenantza fiskalen alorrari dagokionez, Bilduk azken orduan aurkeztutako emendakin bat aztertu zuten. Horrela, termikoaren itxiera dela eta, lurzoru industrialean edo hirugarren sektorekoetan dauden ondasun higiezinei gehienez milako 6ko tipoa jartzea proposatu zuten. Itxasok hori inolako txostenik gabe eta azken orduan aurkeztea kritikatu zuen: «Orritxo bat izatea iraingarria da».

Amaia Agirregabiria alkateak tasa hori beste herrietakoari berdintzeko dela ihardetsi zion. «Zergatik ekarri dugun gaur? Ohiane [Oronoz, Donibaneko alkateordea] termikoaren itxiera aztertzen ari zen, eta aukera hori dagoela ikusi dugu. Herritarrek ordaindu beharrean, hobeto da lurzoru industrialekoek ordaintzea; ezin genuen tren hori galdu». Bildu eta Ezker Anitzaren botoekin atera zen aurrera emendakina (jeltzaleak abstenitu ziren).

Politikarien soldatak
Langile publikoei egin zaizkien murrizketak ere izan zituzten hizpide. Horrela, ordezkari politikoen soldatak (lanaldi osoa edo partziala dutenek) langile publikoenarekin berdinduko dira. Horrela, murrizketak baleude, edo greba egunetan eguneko soldata deskontatzeko garaian, eurei ere eragingo die. Aho batez onartu zen proposamena.

Ia erabateko adostasuna egon zen kale eta plaza berriei izena jartzerakoan ere. Bidasoa Goiako kale berriari Larrabide izena jarriko diote (ondoan zegoen baserriagatik), eta Velascon egingo duten plazari Nabarra Bouarena. Izan ere, 1936ko gerran pasaitar asko hil ziren «askatasunaren defentsan». Itsasontzia Pysbekoa zen.

PSE-EEk tasa judizialak ordaintzearen kontrako mozioa aurkeztu zuen. PPk izan ezik, gainontzekoek alde bozkatu zuten. Bilduk justizia «euskalduna, adierazpen askatasuna bermatuko duena eta benetakoa» izateko eskaera egin zuen, eta Oreretako bost gazteei elkartasuna adierazi zien. Donibaneko eraikin balioanitzaren 2. eta 3. kontratazio faseari ere hasiera eman eman zioten, PPren abstentzioarekin.

Atxikitzen direnek, pegatina eramango dute egun osoan. Horrez gain, atxikimendu hori “ikusgarriago izan dadin”, kalejira antolatu du Antxoko Herrirak. 19:30ean aterako da Zumarditik.

Urtarrilaren 5ean, berriz, Antxon manifestazioa egingo dute. Datozen egunetan emango dituzte xehetasun gehiago.

Atzo hasi zen etenaldia (ezohiko udalbatzarra zegoelako), eta datorren astean zein hurrengoan (urtarrileko lehenengo astean) ez dute harrerarik egingo.

Donibaneko alkateordeak urtarrilaren 8a izango du urteko lehenengo harrera eguna, eta gainontzeko hirurek 9an.

Honakoak dira ordutegiak: Donibanen astearteetan, 16:30etik 18:00etara (Oihane Oronoz); San Pedron, Jose Luis Sanz, 19:00etatik 20:30era; Antxon, 19:00etatik 20:30era (Izaskun Biurrun) eta Trintxerpen Amaia Esnarriaga, 18:30etik 20:00etara, azken hiru horiek asteazkenetan.

Ba ondo. Trintxerpen eta San Pedron hildakoak berpizten dituen ardoaren gabezia dugun arren, metro dotore bat jarri digute. Noski, asmakizun bikainera iristeko nahiko gaizki daukagu dena: hamar minutu edo gehiago oinez; bizpahiru semaforotan itxaron eta behin-behineko eta segurtasunik gabeko igarobideak gurutzatu. Hori guztia, segurtasun falta nabaritzen den toki batzuetatik pasatu ondoren.

Egia da topo zaharrarekin horrelako arazoak bazeudela, baina uste genuen Donostialdeko Metroarekin azpiegitura hobea egingo zutela: irisbide hobeak; Orereta-Irun eremura gehiago hurbilduko gintuen zerbait…

Lehen gaizki bagenuen, orain okerrago dugu! Ez gara Donostialdekoak izango…

Geltokia eder-ederra utzi dute, baina kristoren hotza egiten du bertan. Esandakoa: oso polita utzi dute, Metro Donostialdea dioen kartel zuri-urdin ederrekin. Horretarako 1.300.000 euro gastatu dituzte. Eta pentsatzen dut: ez al zen errazagoa, diru hori, trintxerpetarroi eta sanpedrotarroi irisbide hobe eta duinagoak jartzeko erabiltzea?

Topo izena metro baino gehiago gustatzen zait. Gainera, munduan satorrean ibiliko liratekeen bakarrak izango ginateke. Ez da gutxi!

Jesus Aizpurua Larrañaga. San Pedro.